Rezon ki fè mwen ekri

M pa ekri pou m di betiz 
Men pou m dekri moun kap di betiz

M pa ekri pou fè pèsonn plezi 
Men tout moun ka pran plezi 
Nan sa m ekri

M pa ekri pou m montre m pi bon 
Men toujou eseye di sa ki bon 
Tout moun ka li e pran sa ki bon

M pa ekri pou foli 
Men tout moun ki gen foli 
Ka geri nan li sa m ekri

M pa ekri pou m bay manti 
Men si w konn bay manti 
W ap di sa m ekri se manti

M pa ekri pou fè wè 
Men depi w gen je pou w wè 
W ap wè m dekri sa w pa t ka wè

M pa ekri paske m konn ekri 
Men paske ekri 
Se mwayen pou m dekri

Dekri sa m konnen 
Dekri sa m santi 
Dekri sa m wè 
Dekri sa m ta renmen

M fè k tanmen ekri

Jerome Dorsonne Emerson