Eske jalouzi se prèv yon vrè renmen?

Yo toujou di depi yon moun renmen w tout bon vre, lap fè jalouzi pou ou. Konsa, jalouzi ta sanble yon prèv ke menaj ou renmen w. Eske se vre?

Dabò, kisa jalouzi a ye? Gen de fason yo defini jalouzi.

1. Santiman ki fè yon moun regrèt sa yon lòt posede, tankou richès, siksè, laglwa. ..
2. Santiman ki fè yon moun pè pou moun li renmen an pa prefere yon lòt moun, oswa twonpe l ak moun sa.

Sijè nou an chita sou dezyèm nan

Yon vrè renmen se rezilta konfyans. 
Konfyans se rezilta konesans. 
Konesans se rezilta dyalòg. 
Dapre François La Rochefoucauld (1613-1680) : La jalousie se nourrit dans les doutes et elle devient fureur, ou elle finit, sitôt qu'on passe du doute à la certitude.

Trè souvan, se mank konfyans ki fè yon moun fè jalouzi. Li toujou panse menaj li ka twonpe l. Se sak fè gen moun ki pa dakò menaj li soti san l pa konnen oswa al viv lwen. Kay nèg ki jalou se prizon pou madanm li. Li ta prefere met lemond anndan an poul pa soti.

Konsa tou, gen jalouzi ki byen fonde. Pa egzanp, eskew gade fim Proposition indécente lan, kote yon nèg rich lwe yon fanm nan men mari l pou 1 milyon dola. Misye te fin dakò men apre l te vle mouri. Dèfwa, gason an fè jalouzi lè l konnen zanmi menaj li se jilèt. Fi a ka fè l tou, lè l konnen fi ki anfas menaj li a ka pran l.

Gen anviwon 5 fason yon jalouzi ka manifeste:

1. Nan silans

Moun sa a jalou men li pap diw sa. Gen plizyè danje ak tip de jalouzi sa a. Premyeman, silans la konn fèl soufri jis li vin malad, lap megri e sil pa kapab ankò, li ka kraze relasyon an oswa fè mechanste. Pou evite dega sa yo, ou dwe chache konnen rezon silans sa a. Sinon, ou ka viktim lèw pa kwè.

2. Nan fè zen

Bon, lè yon fi kabrouya, tèktèk, cholin, epi l jalou, se tèt chaje. Zen ka met pye fasil. Se pa tout gason kap fè zen men li pi fasil pou fi a kite gason ki renmen zen ke gason an kite fi ki renmen zen. Rezon an senp: fi pa renmen gason kap fè jalou sòt. Gen gason tou ki pè fi zenyèz, yo lage cha depi jalouzi mete pye. Marcel Proust(1871-1922) te di: On trouve innocent de désirer et atroce que l'autre désire. Siw jalou paske yon lòt moun ap koutize menaj ou, gad pouw wè siw pa konn fèl tou. Pase m tap pase....

3. Kite detanzantan

Chak fwa gen yon sèn jalouzi, gen fache e fache souvan mennen kite. Men depi gen bon renmen, ap gen rekonsilyasyon. Konsa tou, sa konn serye epi relasyon kraze nèt.

4. Li ka rann resipwosite

Gen moun ki konn fè menaj li fè jalouzi pou l remèt kou, men se pa janm yon bon lide. Imajinew moun ou sèvi a te renmen w e menaj ou a te sispèk li avèw. Ebyen w tou montre sa l te panse a se verite. Answit, gen posiblite pou moun sa a pwofite fè w bagay ou ka regrèt aprè, sitou siw te fè yon jalouzi san rezon. Siw oblije remèt yon moun kou jalouzi, konnen w pi pa reflechi paske tout moun pa reyaji menm jan. Li tap pi bon pou w mete l atè tou dousman.

5. Nan mechanste

Wiliam Shakespeare, yon powèt e dramatij anglè (1564-1616) ki se otè youn nan pi gran èv literati inivèsèl, te di sou jalouzi: C'est un monstre engendré de lui-même, né de lui-même. Vrèman, jalouzi se yon santiman ki ka rann yon moun mechan paske menm jan gen moun kap tiye lòt pou sa l posede, gen menaj ki ka fè krim pou moun li renmen, men sa toujou fini mal paske nan oken ka, ou pa dwe tiye.

Dapre tout sa nou sot di la yo, èske jalouzi se prèv yon vrè renmen? Wi, paske souvan, moun ki jalou a pa ta renmen pèdi menaj li. Nan yon sans, jalouzi konn pwoteje relasyon an, si gen dyalòg.

Non, jalouzi pa yon prèv renmen si moun ki jalou a enfidèl. Pawòl la di: Pa fè moun saw pa ta renmen yo fèw.

Men kèk remèd pou moun ki jalou

1. Pa chache konnen siw vle viv anpè, 
2. Siw konnen, olyew fè zen ak mechanste, kite moun lan anrepo. Sil chanje, retounen. 
3. Pa diskite sou plas lè menaj ou fè w fè jalouzi. Tann yon okazyon byen chwazi pou w ka esplike l saw pa renmen 
4. Renmen ak moun ou konnen, chache konnen moun ou renmen.

Pawòl yo anpil, men lavi a senp!

Jerome Dorsonne Emerson