Yon lot Ayit posib!

Ekri se yon melanj pasyon, emosyon, santiman, panse ki chita sou bout papye ki bay lespwa. Ekri ka ede moun chanje vi yo. Sa pèmèt anpil moun enspire pou ekri istwa pa yo, pou poze wòch pa yo nan fondasyon chanjman tèt yo, chanjman kominote yo, pou n pa di chanjman mond lan. Tout enpòtans ekri se nan lekti. Gen moun ki renmen ekri, gen lòt ki renmen fè lekti.

“Yon lòt Ayiti posib” se sa anpil ayisyen toujou ap repete, vrè patriyòt yo toujou kwè menm pitit pitit yo ap gen chans viv gran jou sa a. Anpil fwa nou panse sa men nou pa fè sa nou panse yo tounen angrè pou fè branch lespwa pouse, e grenn revolisyon mantal nou jèmen.

Nou di timoun jodi granmoun demen, men kisa n fè pou n ede yo? Si pa gen ankadreman, demen sa p ap janm miyò. Se nan lide sa a “Jeunesse et Lecture”, nan tèt kole ak direksyon Institution Mixte Pédagogique Léonard (Ecole Dabalor), te panche pou yo ankadre jèn elèv sa yo ki vle fè tande vwa yo paske yo kwè “Yon lòt Ayiti posib”.

Si timoun sa yo ki pa gen twòp eksperyans mete tout devouman pou yo chache konnen e reflechi sou pwoblèm sosyete a ap konfwonte, alewè pou moun k ap sibi reyalite a. Kidonk, se yon chans nou jwenn pou n tande yo e aplike sa yo di.

Si yo menm ki piti, yo chwazi fè gwo pa sa, nou menm ki devanse yo, fòk nou wè nesesite pou n fè plis toujou. Sa rete ak nou pou n ede yo, eseye analize sa yo ekri, antre nan panse yo epi aplike sa ki posib yo.

« Yon lòt Ayiti posib » si nou fè tout sa ki posib pou nou kenbe jenès la nan sa ki pozitif. Tout sa nou panse ka tounen reyalite. Si nou panse l, nou reve l, nou ka fè l.

Annou ede jèn yo wè Ayiti yo reve a posib !

Wi, yon lòt Ayiti posib !

Lubérisse Katicha

Powetès

Bibliyografi

Ko-otè rekèy Eclosion du Cœur 
Randevou ak lavi
Decouvrir le potentiel d'une femme

Avan gou

YON TI KONSYANS

Poukisa Ayiti pa ka grandi?

Eske se paske nou twò piti

Oubyen se pwoblèm peyi ?

Moun k ap travay pa janm satisfè

Ti malere ap redi pot chay nan mache anfè

Poutan se pou ogmante mizè

Leta di l ap mande èd nan peyi etranje

Poutan se zafè yo y ap regle

Peyi a pa janm vanse

Nou di nou gen endepandans

Epi lè n ap gade nou wè n sou depandans

Ayisyen, annou pran konsyans !

Li lè li tan pou n viv nan diyite

Pou lòt peyi sispann pase n anba pye

Se pou n respekte deviz nou ki baze sou linite

 Désulmé Ronaldinia, 8^e A.F

PRAN DESTEN NOU AN MEN

Ayiti se yon peyi solèy

Kote ki gen anpil mèvèy

Yo vle kraze l tankou boutèy

Paske anpil nan nou gen gwo lògèy

Nou menm ayisyen

Pouki nou toujou ap goumen ?

Sa fè nou pa janm ka byen

Nou kite peyi a fin dechennen

Peyi nou bezwen chanjman

Tipa tipa, nou ka chanje chak depatman

Ayisyen, li lè li tan

Pou n ap mache sou wout devlopman

 Estiverne Rodberson, Segondè 1

EDIKASYON

Yon timoun ki pa jwenn bon edikasyon

Se kòmsi li fè maladi opresyon

An Ayiti, nou gen anpil tan n ap goumen

Nou pa jwenn moun pou lonje n lanmen

Elèv yo ap fè efò pou yo rive

Men anpil nan yo echwe

Edikasyon an Ayiti pa gen onètete

Se sa k fè anpil elèv ap viv nan egare

An nou bay edikasyon respè

Se li ki ka fè n viv nan lapè

Edikasyon bay timoun valè

E li ka fè n gen yon demen meyè

 Thélius Wetsmender, 7e A. F

AYITI KA CHANJE

Ayiti ka chanje

Paske se pa konsa l te ye

Sa pou nou chache

Se viv nan linite

Inite ka fè anpil bagay

Li ka ede n sot nan soufrans

Li ka met atè anpil gwo chay

Li ka fè n evite maltretans

Ayiti ka chanje si nou pran konsyans

Si moun k ap dirije l yo gen bon sans

Ann pa kite lòt peyi maltrete nou

Annou viv nan lanmou

 Joseph Mitchelson, 9^e A.F