Pran randevou ak lavi menm jan ak Katicha

Avan w pran randevou ak lavi, manvi chante de twa ti pawòl nan zòrèy ou, marande ak yon kantik wosiyòl pou m esplike w tout ralemennen vini Luberisse Katicha te fè pou l akouche rèv sila.

Tan ap pase, lapli ap tonbe, demwazèl la refize kanpe, li bwave danje e mete bòt desanlye li pou l franchi gwo boulva literati a...Se pa yon bagay ki fasil men li menm, li deside pran randevou ak lavi !

Randevou ak lavi, se yon ti rekèy wòdpòt, kote powetès la rasanble tout kalite powematik li pou l mete gou dous sou lang nou chak.

" Solèy midi tenyen nan midi lavi m

Bajou kase san je m pa fèmen

M bliye lepli, ni lesèk

Tèlman pwoblèm makonnen m "

Katicha trase nan liv la yon reyalite ke nou viv chak jou swa nan antouraj bò lakay nou, swa nan pwòp eksperyans pa nou. Li dekri tou yon pakèt bagay ke l wè nan sosyete a epi tante pwopoze nou solisyon tou. Katicha se zanmi liv, li fè li ak ekri tounen chwal batay li. Plim ni make revòlt, revòlt kont povrete, revòlt pou mounite a respte sou tout fòm. Achak fwa nou kwaze yon travay konsa, nou blijo bat bravo lakontantman...

" Nou gen lontan n ap batay

Depi sou Tikonmkonm ak Berejèn

Nou toujou itilize menm estrateji yo

E nou toujou echwe nan prèske tout pakou yo "

Si nou pa pran randevou ak lavi, Katicha pa responsab ! Paske li pwopoze nou yon latriye plòt tèks pou diyite nou pa mouri nan pasaj. Deja m ap di nou pran desten nou anmen pou n ka kenbe demen nou nan de men.

Jean-Baptiste Guten Rachad

 Pwofesè, Ekriven..

Avan gou

M bezwen yon plim

M bezwen yon plim

Pou m reekri listwa lavi m

M p ap rann li pi fasil

Men m ap ogmante sou fòs mwen

Pou m konbat tout move moman

M bezwen yon plim

Pou m reekri listwa Tisentaniz

M p ap chanje wòl yo

Men m ap met ekilib nan mitan pèsonaj yo

Pou m kreye mond mwen bezwen an

M bezwen yon plim

Pou m reekri listwa peyi m

M t ap vwayaje nan tan ki pase

Pou retire dominasyon kolon

Epi met konpasyon pou esklav 

M bezwen yon plim

Pou m reekri listwa mond lan

M pa t ap retire lide lagè

Men m t ap itilize mo pou preche lapè

Konsa tout listwa t ap sous kè kontan