Guten Rachad nan "MOSO PAWOL"

Nan kòmansman te gen moso pawòl ki te itilize pou kreye, chatye ak preche. Pi douvan, gwo batay pral mennen pou libète lapawòl te ka respekte paske bouch fèt pou pale, di koze ki soti nan fon kè pou pentire lanati.

Ekriven yo, tankou Rachad, pran responsablite yo pou marye lank ak moso papye k ap ede yo akouche pitit ki pote non moso pawòl pou yo ka jwenn dwa di sa yo vle san bòday.

Lapawòl se kle pou louvri e klete pòt. Li ka touche kè san chiriji, pèse zo san glèv, vwayaje nan tout lòt peyi san monte kamyon ni avyon. Li ka blese e geri an menm tan. Li ka bay manti pou yon pati e bay gwo verite pou yon lòt pati. Li chase dezespwa, pouse bourèt chanjman, netwaye kannal panse pou devlopman.

Se nan lide sa a, Jean-Baptiste Guten Rachad te pran tout san fwa li pou chwazi kèk moso pawòl pou simaye sa l panse ak yon ti kout dlo cho, yon ti kout dlo frèt, yon moso ladrès, yon ti kout plezantri, yon godèt soufrans, yon asyèt rejwisans, yon basen lajwa, yon ti kras fache.

Mwen envite w pran ti chèz ba w pou koute vwa yon pitit Vèrèt k ap klewonnen nouvèl libète nan lakou Ayiti Toma.

Lubérisse Katicha

Avan gou

Bagèt legede

Apre midi a

Lakansyèl la fad

Li pèdi tout koulè l yo

Devan je solèy

Si lalin pa t griyen dan l

Pou m te wè l djòl kalili

Mwen t ap rele l gwo chèlbèdèk

Se nan viwonndede zetwal

Mwen arive wè payèt janmdebwa

Si cheve lanati tresayi

Konnen pèp Ayisyen

Kanpe an bagèt legede

 Remak

Lanmou kounye a

Se fotokopi

Original la sere

Nan òdinatè

L ap tann kouran

Pou l dawonnlod

A san pou san

 Anvi mizik

Nan fant fenèt la

Yon ti mizik vin karese zòrèy mwen

Yon ti mizik ralemennenvini

Ki dous

Ki fè m panse ak paradi

Se nan miwa solèy

Mwen te konn wè lonbraj

Bèl senfoni sila

Anverite pito anvi mouri te pran m

Olye m touche syèl

Sou latè beni

Oubyen pito m te mizik

Mwen ta pase nan fenèt

Pou m karese zòrèy vwazin nan

Chak maten

 Guten Rachad Jean Baptiste