Lis liv (livrets) Jerome Dorsonne Emerson ekri deja, depi 2003

1.    Zèl nanm (2017)

2.    18 me nan Mowo Dwèt (2017)

3.    Eske fònikasyon ka anpeche m sove (2017)

4.    Yon ti koze sou evanjelizasyon 

5.    Yon ti koze sou edikasyon seksyèl (2016)

6.    Les causes et les conséquences de l’adultère (2017)

7.    Ce qu’il faut savoir avant de se marier (2016)

8.    Les causes et les conséquences de la fornication (2016)

9.    Les causes et les conséquences du mariage précoce (2015)

10.  Pastè a tonbe damou (2015)

11.  Radyografi evanjelizasyon an

12.  Evanjelize pou kont ou….

13.  Konesans pou grandi nan lafwa (2014)

14.  Bon konsèy sou renmen

15.  Ann al chache nanm pou Kris, # 2

16.  Ann al chache nanm pou Kris, #1

17.  25 Kesyon/Repons sou renmen (2012)

18.  10 rezon pou yon kretyen pa prese renmen

19.  Revè lanmou (2012)

20.  Les dangers des rapports sexuels avant le mariage(2012)

21.  Seigneur, j’ai besoin d’un/e homme/femme

22.  Alphabet du vrai amour (2012)

23.  Papa’m pa vle’m renmen(2012)

24.  Si m te ka rekòmanse, #3

25.  Sim te ka rekòmanse, #2 (2012)

26.  Si manman m te konnen (2012)

27.  Sim te ka rekòmanse, #1 (2011)

28.  Pastè, mwen ansent!(2010)

29.  Au coeur d’une femme (2009)

30.  Belle Liancourtoise (2007)

31.  Je t’aime fanm Kreyòl (2007)

32.  Pages de mon coeur (2006)

33.  La Passion du Poète (2005)

34.  Kote Flè Pouse (2003)

Radyografi evanjelizasyon an

Radyografi evanjelizasyon an se yon analiz, yon deskripsyon egzat de evanjelizasyon an (kisa li ye?). Li se yon etid sistematik sou rezon evanjelizasyon an (poukisa?), sou moun kretyen an (kiyès?), sou moun ki bezwen tande levanjil la (kiyès ki bezwen tande levanjil la?), sou kote pou kretyen an evanjelize (ki kote?), sou fason pou kretyen an evanjelize (kòman?) e sou tan kretyen an genyen pou l evanjelize (kilè?).

Konsa, radyografi evanjelizasyon an baze sou 7 kesyon sa yo :

1.      Kisa evanjelizasyon an ye ?

2.      Poukisa kretyen an dwe evanjelize ?

3.      Kiyès ki ka evanjelize ?

4.      Kiyès pou kretyen an evanjelize ?

5.      Ki kote pou kretyen an evanjelize ?

6.      Kòman pou kretyen an evanjelize ?

7.      Kilè pou kretyen an evanjelize ?

Yon vrè kretyen, yon sèvitè responsab pa ka refize evanjelize lè li fin konprann etid sa sou radyografi evanjelizasyon an.

JDE

 Avan gou

I.                  Poukisa kretyen an dwe EVANJELIZE?

                                                                                                                                                            

Se sèten si ou pa konn valè yon bagay, li pap gen enpòtans pou ou. Premye rezon ki ta dwe fè yon vrè kretyen evanjelize, se paske se gras ak li li te konvèti. Gen lòt rezon ankò si nou byen reflechi sou yo, nap dekouvri koz ki fè evanjelizasyon an neglije konsa, e nap gen plis anvi chak jou pou n fè l.

1.      Evanjelize se yon lòd 

Si ou konprann kisa dezòd ye, w ap konprann kisa yon lòd ye pi byen.  Jezi pa t jis bay disip yo lòd pou evanjelize, li te fè yo konnen rezon an (Mak 16.16). Gen yon jou li gen pou jije tout moun ki te mouri e ki pat kwè nan Li. Anplis de sa, Jezi te bay disip yo otorite (Mak 16.17) e li te pwomèt yo prezans li   jiskaske tout bagay fini (Matye 28.20b). Angwo, nou wè Lòd, Otorite, Pwoteksyon oswa akonpayman. Sa fè nou konprann kretyen ki pa vle evanjelize a pa sèlman meprize lòd Jezi, men li pa kwè nan otorite li resevwa – sil ta resevwa l deja – ak pwoteksyon Jezi.

Pa evanjelize se dezobeyisans – sitou si kretyen gen kapasite pou fè sa – e tout dezobeyisans se peche (1 Jan 3.4). Evanjelizasyon an se yon lòd, tout kretyen dwe fèl.  Jak di: « Moun ki pa fè byen li konnen li gen pou l fè peche » (Jak 4.17). Souvan nou plis kritike moun kap fè sa ki pa bon, men nou pa wè peche nap fè tou. Si evanjelizasyon an la pou sove moun ki pa kwè nan Bondye, se yon byen li ye.  Bib la pa manke ankouraje nou fè sa ki byen.

2.      Evanjelize se yon privilèj

Evanjelize se yon privilèj paske antanke pechè, ou pa ta dwe ap travay pou yon Bondye ki Sen. Bondye gen pouvwa pou li fè travay li san èd moun. Dayè, li pat mande lòm pyès konsèy pou li te fè syèl ak tè a. Anplis, lòm pat ko menm egziste lè Bondye tap kreye tout bagay. Lòm vin jwenn tout bagay nan plas yo (Jenèz 1-2). Nan Jenèz 2.26, Bib la di : « Ann fè moun ». Se jis aprè Bondye te fin kreye tout bagay ke li te di sa. Li te voye pwòp Pitit li vin mouri pou lòm. Malgre sa, Pitit la te di : « Papa, padone yo. Yo pa konnen sa y’ap fè » (Lik 23.34) Se vre yo pat konprann paske pi devan anpil ladan yo ta pral rekonèt peche yo (Travay 2.36).

Evanjelize se yon privilèj, paske Bondye chwazi nou malgre peche nou. Refize evanjelize, se meprize yon si gran privilèj. Eske w pa tap kontan si yon prezidan oswa yon nonm rich ta pran w kòm delege pou rekonsilye li ak ènmi li yo ? Menm jan an, fòk ou kontan tou dèske ou se delege nan rekonsilyasyon Bondye ak lemond (Women 5.11;11.15).

3.      Evanjelizasyon an enpòtan 

Evanjelizasyon an enpòtan paske se yon mwayen ke Bondye itilize pou revele plan li ak tout moun (Travay 2.14-3). Li se youn nan prèv ke Bondye renmen lòm anpil. Li te ka chwazi kite nou viv jan nou vle san avize nou de sa ki pral rive aprè lanmò. Lè sa a, nou te ka wè l mal. Men li fè nou konnen sa ki pral rive nan dènye tan yo (Matye 24), yon fason pou nou pa di nou pat konnen. Jezi te di : « Mwen di nou sa davans » (Matye 24.25). Si premye disip yo te dezobeyi, nou pa tap sove jodi a. Ebyen, se sa ki rive tou lè nou pa vle ale nan tout ti kwen kote moun pa rive fasil yo pou n simen pawòl la. Evanjelizasyon an enpòtan paske lap fè pechè a delivre anba pouvwa peche, e konsa, lap evite lanfè. Yon zanmi Doktè Lyman Beecher te mande li yon jou : « Doktè, ki pi bèl bagay ki genyen nan lemond?” Li reponn: “Se pa teoloji, ni se pa diskisyon san sans, men se chache nanm pou Kris ». Deklarasyon sa pa diferan de sa Jezi di : « Kisa sa ta sèvi yon moun pou l ta genyen lemond antye si’l pèdi lavi li ? » (Matye 16.26). Se donk enpòtan.

4.      Evanjelizasyon an se yon ijans

Evanjelizasyon an pa sèlman enpòtan, men  li mande prese prese paske pyès moun pap ka repanti aprè lanmò (Revelasyon 20.12-15), tandike tout moun gen pou mouri (Women 6.23). Pou sa, evanjelize se yon ijans. Neglije fè li, se bay Satan avantaj pou l gen plis moun. Ijans evanjelizasyon an dwe fè nou reflechi e aji rapid pou li pa twò ta pou enkredil yo.

5.      Rekòt la anpil

Rekòt la nan Matye 9.37 la se foul moun yo. Nan tan pa nou koulye a, se tout moun yo ki deyò a, tankou : moun nan bann rara, nan kanaval, nan regenay ; moun kap sèvi dyab,  vann kò yo e pran tout kalite plezi. Chak lè ou remake yon foul moun kap rejwi nan plezi mond sa a, konnen ke ou dwe aji paske ou la pou ramase rekòt la pou Kris.

6.      Manke travayè

Travayè yo nan rekòt la se disip Kris yo. An reyalite, lè Jezi te di sa a, pat ko gen anpil disip (Matye 9.38). Men depi nan Fèt Pannkot la, rekòt la te kòmanse. Apot yo te rekòlte 3mil nanm pou Kris. Jodi a, nap mande èske se paske moun ki Legliz yo pa disip Kris ki fè yo pa vle evanjelize. Avan Jezi te voye disip yo, li te chwazi yo (Jan 15.16) e fòme yo (Matye 4.19). Malgre anpil kretyen konnen ke se Bondye ki te chwazi yo, yo pa sispann refize evanjelize. Eske se paske yo poko gen fòmasyon pou sa ? Si wi, poukisa yo pa jwenn e kilès ki la pou fè sa? Sinon, twazyèm lòd nan misyon an pa respekte : « Montre yo pou yo obsève tout sa mwen te ban nou lòd fè » (Matye 28.20a).

Lè yon moun fin konvèti, li batize, li pa fin kretyen pou sa. De premye lòd yo pèsonèl paske se moun lan ki pou deside kwè, epi resevwa batèm. Men kanta pou anseye a, se devwa disip-anseyan yo ki pou fèl. Se sa ki fè, lè yon moun ki fin konvèti e batize, li pa fè anyen nan Legliz la, se yon pwoblèm.  Kòman yon moun fè angaje l pou swiv Kris e pou l pa gen oswa jwenn anyen pou fè? Sa plis sanble li pa angaje vre paske pa gen kwaze bra nan Legliz Kris la, tout manm yo se sèvitè, fòk yo sèvi Bondye.

Gen 3 dimansyon nan sèvis kretyen an:

1.      Sèvi Bondye (adorasyon)

2.      Sèvi manm Legliz la (edifikasyon)

3.      Sèvi lemond (evanjelizasyon)

Yon kretyen ki pap travay pa gen plas nan fanmi Kris la. Li tankou yon ti moun san papa oswa yon etranje.

Yon lot Ayit posib!

Ekri se yon melanj pasyon, emosyon, santiman, panse ki chita sou bout papye ki bay lespwa. Ekri ka ede moun chanje vi yo. Sa pèmèt anpil moun enspire pou ekri istwa pa yo, pou poze wòch pa yo nan fondasyon chanjman tèt yo, chanjman kominote yo, pou n pa di chanjman mond lan. Tout enpòtans ekri se nan lekti. Gen moun ki renmen ekri, gen lòt ki renmen fè lekti.

“Yon lòt Ayiti posib” se sa anpil ayisyen toujou ap repete, vrè patriyòt yo toujou kwè menm pitit pitit yo ap gen chans viv gran jou sa a. Anpil fwa nou panse sa men nou pa fè sa nou panse yo tounen angrè pou fè branch lespwa pouse, e grenn revolisyon mantal nou jèmen.

Nou di timoun jodi granmoun demen, men kisa n fè pou n ede yo? Si pa gen ankadreman, demen sa p ap janm miyò. Se nan lide sa a “Jeunesse et Lecture”, nan tèt kole ak direksyon Institution Mixte Pédagogique Léonard (Ecole Dabalor), te panche pou yo ankadre jèn elèv sa yo ki vle fè tande vwa yo paske yo kwè “Yon lòt Ayiti posib”.

Si timoun sa yo ki pa gen twòp eksperyans mete tout devouman pou yo chache konnen e reflechi sou pwoblèm sosyete a ap konfwonte, alewè pou moun k ap sibi reyalite a. Kidonk, se yon chans nou jwenn pou n tande yo e aplike sa yo di.

Si yo menm ki piti, yo chwazi fè gwo pa sa, nou menm ki devanse yo, fòk nou wè nesesite pou n fè plis toujou. Sa rete ak nou pou n ede yo, eseye analize sa yo ekri, antre nan panse yo epi aplike sa ki posib yo.

« Yon lòt Ayiti posib » si nou fè tout sa ki posib pou nou kenbe jenès la nan sa ki pozitif. Tout sa nou panse ka tounen reyalite. Si nou panse l, nou reve l, nou ka fè l.

Annou ede jèn yo wè Ayiti yo reve a posib !

Wi, yon lòt Ayiti posib !

Lubérisse Katicha

Powetès

Bibliyografi

Ko-otè rekèy Eclosion du Cœur 
Randevou ak lavi
Decouvrir le potentiel d'une femme

Avan gou

YON TI KONSYANS

Poukisa Ayiti pa ka grandi?

Eske se paske nou twò piti

Oubyen se pwoblèm peyi ?

Moun k ap travay pa janm satisfè

Ti malere ap redi pot chay nan mache anfè

Poutan se pou ogmante mizè

Leta di l ap mande èd nan peyi etranje

Poutan se zafè yo y ap regle

Peyi a pa janm vanse

Nou di nou gen endepandans

Epi lè n ap gade nou wè n sou depandans

Ayisyen, annou pran konsyans !

Li lè li tan pou n viv nan diyite

Pou lòt peyi sispann pase n anba pye

Se pou n respekte deviz nou ki baze sou linite

 Désulmé Ronaldinia, 8^e A.F

PRAN DESTEN NOU AN MEN

Ayiti se yon peyi solèy

Kote ki gen anpil mèvèy

Yo vle kraze l tankou boutèy

Paske anpil nan nou gen gwo lògèy

Nou menm ayisyen

Pouki nou toujou ap goumen ?

Sa fè nou pa janm ka byen

Nou kite peyi a fin dechennen

Peyi nou bezwen chanjman

Tipa tipa, nou ka chanje chak depatman

Ayisyen, li lè li tan

Pou n ap mache sou wout devlopman

 Estiverne Rodberson, Segondè 1

EDIKASYON

Yon timoun ki pa jwenn bon edikasyon

Se kòmsi li fè maladi opresyon

An Ayiti, nou gen anpil tan n ap goumen

Nou pa jwenn moun pou lonje n lanmen

Elèv yo ap fè efò pou yo rive

Men anpil nan yo echwe

Edikasyon an Ayiti pa gen onètete

Se sa k fè anpil elèv ap viv nan egare

An nou bay edikasyon respè

Se li ki ka fè n viv nan lapè

Edikasyon bay timoun valè

E li ka fè n gen yon demen meyè

 Thélius Wetsmender, 7e A. F

AYITI KA CHANJE

Ayiti ka chanje

Paske se pa konsa l te ye

Sa pou nou chache

Se viv nan linite

Inite ka fè anpil bagay

Li ka ede n sot nan soufrans

Li ka met atè anpil gwo chay

Li ka fè n evite maltretans

Ayiti ka chanje si nou pran konsyans

Si moun k ap dirije l yo gen bon sans

Ann pa kite lòt peyi maltrete nou

Annou viv nan lanmou

 Joseph Mitchelson, 9^e A.F

Zel nanm pou vole libelibè!

Eske tout moun ge libète pou yo ekri ? Eske li fasil pou yon moun ekri sa li santi ? Eske gen yon metòd pou yon moun ekri santiman li ? Ekri se yon aktivite ki mande anpil konsantrasyon ak kapasite pou senplifye konpleksite egzistans la.

Lè yon moun deside ekri sou yon sijè oswa eksprime li nan yon domèn, lid we jwenn yon mote ki pou pèmèt li mete yon mekanis anplas pou li ka byen estriktire panse li. Yon mote ki pou motive l ekri sa li we, sa li santi, jan li santi l nan yon demach pou pote limyè nan sosyete l ap grandi a.

Se nan optik sa, Zèl Nanm, yon rekèy tèks, ap ede w konprann anpil bagay sou sans lavi, sou moun ki nan antouraj ou, sou relasyon santimantal, espirityèl e kap pèmèt ou grandi chak jou.

Menm jan Victor Lvovitch Kibaltchichk di: « Moun k ap pale, moun k ap ekri se yon moun k ap pale pou tout moun kip a gen vwa ».

Se konsa Jérôme Dorsonne Emerson fè nou santi a chak fwa nou tounen yon paj nan rekèy tèks sa a. Zèl Nanm gen pou misyon montre tout moun libète yo genyen pou eksprime yo nan tout domèn.

Li montre nou tou pasyon otè a genyen pou motive jenès la e menm granmoun yo tou pou y opa janm abandone, pou yo toujou wè bon kote ki genyen nan tout bagay malgre moman difisil yo.

Zèv sa a adrese ak tout moun ki deside chwazi grandi nan sans pozitif e ki vle eksplwate libète yo genyen pou pale libelibè nan tout domèn ki entèrese yo.

Bon lekti ! Bon vwayaj !

Sterluz de Payen

Montréal, Canada

DEC en Cinéma

Uquam, en Sciences Politiques

Avan gou

Lè yap pale w mal paske w ap mal pase, 
Se pa joure pou w joure 
Ni eseye defann ou 
Ni bay detay sou rezon k fè sa 
Ni al plenyen bay zanmi.

Jis fè yon ti reflechi 
Sou vrè rezon ki lakoz sa

Si se paske w vle kenbe diyite w
Paske w ap pran pasyans 
Paske w pa nan fè wè 
Paske w pa nan konkirans 
Ou mèt kite yo pale

Paske lè w pral byen pase a 
Se yo ki pral temwanye pou ou 
Se yo ki pral di men kòman sa te ye 
Se yo ki pral sezi

E lè sa, yo va konprann 
Moun ou ye a, se pa sa yo wè jodi 
Moun ou ye a, se pa sa moun di de ou 
Moun ou ye a, se pa sa lòt moun vle w ye
Moun ou ye a vo plis ke lò
Moun ou ye a vo plis ke byen materyèl 
Moun ou ye a vo plis ke kritik

Kou lòt la te di: 
Mesye, jodi a kritik ou yo devanm 
Men talè konsa yo gen pou dèyè m

Kite kritik yo pouse w devan 
Kite kritik yo fè pwomosyon pou ou 
Kite kritik yo evalye travay ou
Kite kritik yo fòme karaktè w

Mande Bondye pou l bay enmi w lan fòs 
Pou l ka ede w kenbe mach ou 
Pou l ka ede w respekte tèt ou 
Pou l ka ede w fè siksè nan fè efò.

Plis tande, plis sajès, plis siksè.

JDE